周潤發一直以嚟都熱愛攝影，咁多年影咗無數相片，嚟緊影迷有機會欣賞到發哥嘅黑白相作品！發哥同攝影好友黃貴權將舉行名為「香港印象—黃貴權＋周潤發攝影作品展」攝影聯展，開幕禮喺後日下午6時於香港中央圖書館展覽館舉行，展期至呢個月19日結束。

籲好友折現賑災

發哥日前就同影友及工作人員喺尖沙嘴為攝影展做最後準備，發哥話：「今次攝影展籌備咗半年，展出所有作品都係黑白相，我有41張，黃貴權就有75張，佢嘅作品拍攝時間係66至75年，我啲相就係2000到08年，中間80年代嗰段，嗰時忙緊拍戲，邊有時間影相，所以真空咗。」不過開幕禮當日，發哥因為喺日本宣傳電影《龍珠：全新進化》，所以唔會出席，發哥話：「開幕嚟唔到，閉幕嗰日再補數。」
雖然攝影展係免費入場，但發哥同拍檔黃先生希望藉住呢個活動為四川地震災民籌款，所以呼籲捧場嘅好友，將送花籃嘅錢折現捐助賑災，黃貴權話：「之前都辦過攝影展，將送花錢折現都籌到接近20萬。」