被視為科幻神劇的《黑鏡》第四季噚日開播，劇集一向以科技禍害作主題，共6集以獨立故事方式呈現。其中一集《暗黑博物館》（Black Museum）就以3個小故事串連，一開始女主角駕車去到無人沙漠，誤打誤撞入咗間暗黑博物館參觀，入面嘅展品睇上去非常無謂：一個頭套、一個馬騮公仔、一個虛擬電擊死刑台。但如果深入了解，就知道其實每件展品背後故事都非常恐怖，例如當中嘅馬騮公仔，原來入面有一個植物人媽媽嘅意識，因為佢想重新感受生活同見返個仔，而靠科技重生於老公嘅意識入面。但老公漸漸就覺得老婆好煩，自己又識咗新女朋友，所以就設法賣甩老婆意識，之後竟然恐怖到將老婆轉移到一隻公仔身上，從此老婆就變成死物，一世被困。呢啲咁恐怖嘅科學實驗，全部都嚟自館長嘅發明，最後觀眾更發現，虛擬電擊死刑台入面嘅人係真實存在，即係佢時時刻刻都要受電擊極刑嚟滿足觀眾。至於一開始講個女主角，原來係呢個受害者個女，刻意到訪為大復仇，最後更反客為主將館長困入電擊死刑台。呢個故事睇上去分成幾個小故事，但事實上暗藏連繫，結局更加令人意想不到，可算係今季其中一個最好睇嘅單元。

更多娛聞，喺晒《娛果》
http://fb.com/appledailyent

【minigame】2017瘋暈人物 返工打機唔使擇日
http://bit.ly/2CeWQkP