ViuTV節目《全民造星II》今日在九展舉行記者會，96位參賽者首次見傳媒，劉美君、火火和Eric Kwok就冧莊擔任星級導師，而《造星》前輩組合MIRROR、林二汶、陳詠燊、王貽興和黃天頤亦擔任星級評判。

大會即場宣佈18號黃浚銘、29號梁德忠、53號王焯南、85號趙敬賢及86號陳軍政獲「Eye Catching Idol」，直接打入60強，對於86號陳軍政以8,247票成為票王，他說：「我本身係YouTuber，平時主要拍街頭挑戰同埋整蠱人嘅片段，我有20幾萬YouTube嘅觀眾，Instagram有10萬嘅followers，好多謝支持我嘅觀眾，因為我本身對入60強係好擔心，而家因為觀眾，我可以直入，所以好開心，為咗今次比賽，我去學唱歌。」

今年有3位圈中人參與，包括19號曹震豪、30號英健朗（小占）及97號劉瑞祈，另外還有姜大衛和李琳琳兒子、62號姜卓文和88號王祖藍表弟李俊華（孖八），而再次參加比賽則有12號崔可迪、29號梁德忠、40號容穎賢、53號王焯南、68號黎官驟、78號溫明龍、85號趙敬賢、91號何志浩及98號何駿廷。小占本身是ViuTV主持，有上鏡經驗，他說：「我向來都係搞笑，我想型吓，但我chok緊嘅時候，啲人話我好好笑，到時我會表演唱歌跳舞。」小占又指為公平起見，已跟ViuTV停約停薪，但因為要還騷，部份節目仍要負責主持工作。

提及姜大衛及李琳琳兒子姜卓文是演藝世家出身，會否加感情分？Eric Kwok即說：「我冇感情。」劉美君指他們做事很公正，火火說：「可能會客氣啲，但如果要鬧都鬧架喇，我唔會因為佢係邊個個仔就畀佢入（圍），但知道佢爸爸係邊個，都唔會一句粗口飛埋去，唔好涉及屋企人。」

此外，去年跳樓身亡的盧凱彤（Ellen），事發前一天仍擔任《全民造星》的評判之一，問到林二汶是否替Ellen繼續這個工作？她說：「我哋從來對下一代都有啲寄望，加上我哋都係由前輩帶出嚟，而家我哋大個咗，做咗人哋嘅前輩，就將我哋好嘅嘢講出嚟，其實咁多參賽者爭已經好難，仲要喺分半鐘內表現自己，再由幾個人去決定你可唔可以繼續，就算入唔入圍都好，有冇人同你講真心話係好重要，我諗盧凱彤當時都係想充當呢個角色，要有責任感。」

-----------------------------
7月4日起 《蘋果動新聞》只限升級壹會員閱覽
繼續撐蘋果！
https://hk.adai.ly/e/iIRREmuwDX