李克勤成為「新城勁爆頒獎禮」大贏家，總共得到3.5個獎，包括勁爆年度歌手、勁爆播放指數、勁爆演繹大獎，同埋合唱歌曲獎。不過克勤就謙話：「唔好咁講，係公司嘅功勞，我一個人做唔到，好似一場波咁，我係前鋒負責入波，贏波係全隊人嘅努力，但係呢位前鋒好肚餓，頭先唱歌手都震埋，之前好早同小朋友食咗飯，頭先唱歌時好肚餓。」

克勤又重提喺台上講到新城唔喺26號舉行好好多，佢話：「頭先講嘅都係肺腑之言，以前26號搞，真係大家都辛苦，呢啲係搵錢時間，又係湊仔時間，就算歌迷都辛苦。」

另外，問到克勤有冇掛住新城前高層朱明銳時，克勤話：「一朝天子，年代唔同，o依家新一代班子，應該向前看。當年『霉dum dur』時，係得新城畀獎我，其實一個頒獎禮，以前派百幾個獎有人批評，對我嚟講，新城係雪中送炭。」會唔會係今年新城同英皇破冰至有獎攞？克勤就話：「唔知，我新嚟，我係前鋒，今次係成個團隊嘅努力。」成為大贏家，對之後嘅頒獎禮會唔會更添信心？克勤笑話：「唔知㗎！以前最衰嘅時候，頒獎禮唔請我，有咩衰得過請都唔請，所以o依家學識感恩。」

【minigame】2017瘋暈人物 返工打機唔使擇日
http://bit.ly/2CeWQkP

更多娛聞，喺晒《娛果》
http://fb.com/appledailyent