練馬師沈集成今朝沙田晨課落力督操，最多時間是企在他的食糊位即馬房閘口，等各駒操回來逐一觀看。但有一隻馬卻令沈集成急不及待，老早企在機坪踱步圈，癡癡地望住牠踱步熱身，就係周日（25日）第二場四班1000米的初出馬雷神座騎「旅遊皇者」。

梗係啦，「旅遊皇者」身價720萬之高，沈集成難免加多兩錢肉緊，此駒父系DUPORTH服役時贏過3場，全屬級際賽，包括一場一級賽。在港同父馬「飛來猛」曾奪本地三級賽港澳盃。

而同父同母兄長CORNROW曾於一級賽兩度上名，血統咁好，加上「旅遊皇者」在港試閘勝出走勢佳，前景樂觀，沈集成當然唔會怠慢啦。