新一屆立法會10月起搬入添馬艦新立法會大樓，位於中環嘅舊大樓將會變身終審法院。立法會秘書處噚日特別喺舊大樓搞惜別宴，邀請唔同時代嘅議員一齊參加，好多議員重遊舊地都非常興奮，好似細路仔咁周圍影相留念，馬丁李柱銘更加同大班鄭經翰喺會議廳掟紙飛機，幾乎被現主席曾鈺成大叫「今天不許再回來」。
民主之父馬丁一向好奀皮，佢噚日一見大班，就大唔透咁要一嘗「激進」行為，吼住曾鈺成發言時大喊一聲：「主席，接招。」隨即將手上嘅紙飛機掟向曾鈺成，好彩阿曾都係玩得之人，笑笑口喝令馬丁立即退席，以免失禮街坊。
唐唐同范太兩位下屆特首熱門都喺活動上喜相逢，大方地任影唔嬲，范太仲同唐唐講，「你做議員時好得意，形容自己係一個開明嘅工業家」，唔知話裏有冇玄機？

前行政立法兩局首席議員李鵬飛當然都有出席盛會，佢話做咗議員咁多年，最記得當時仲係民主黨員嘅鄭家富出戰新東，講過一句：「李鵬飛呢種人都做到議員，有乜唔得？」在場嘅阿富聽到飛哥翻舊賬都好尷尬，即場「晒冧」，范太就充當和事老，叫大家唔開心嘅事要一筆勾銷。
新舊議員聚首一堂，話題離唔開以前開會好莊嚴，連坐邊個座位都論資排輩，點想像到家可以掟蕉同掃場？八方最估唔到係年屆92歲嘅前立法局議員王霖反而好開明，話家開會有人掟嘢，都係體現言論自由方式之一，似乎係叫大家唔好大驚小怪。

喺會議廳影相後，好多老鬼都留低參加晚上嘅宴會。做東嘅曾鈺成上台大展歌喉，將《獅子山下》嘅詞改頭換面，對議員凡事成功爭取、借意抽水同開會吹水，聽到唔少在席議員哈哈大笑。據聞肥仔李華明同詹培忠都爭住唱，前者一曲《倩影》令人聽出耳油，後者嘅《我的祖國》就擺明係向北京交心。中指黃就供應全場茅台，好受歡迎，好多議員飲飽食醉先捨得離開第二個家返屋企，告別哭過鬧過hea過嘅昃臣道八號。

mailto:[email protected]