呢排中台兩地藝人關於「性」嘅是非醜聞不絕於耳，噚日爆咗單「奀妹」傅天穎疑與男友公園性戰真係令人O晒嘴，反觀之前無厘頭爆出嘅台灣霍建華同「中國酒店公主」身陷桃色糾紛——內地術語嗌呢啲叫「召妓門」喎，反而備受冷落添。

前日有內地傳媒報道，話一個喺內地某會所做「公主」、微博名叫「五味嬪」嘅女仔，上年7月，係，係上年7月咁耐之前嘅事，喺微博上載三篇話帶一線明星返屋企過夜嘅po。文中透露呢個一線明星眼睫毛長、個鼻好挺，喺佢屋企瞓到1點幾先起身。最近唔知點解有網民拎番出嚟講，齊齊估呢位一線明星就係霍建華。霍建華嘅經理人已回應話 「事情比較複雜，我只能先了解清楚後再回覆。」

經理人話「事情比較複雜」，令人覺得好似「無私顯見私」，反而女主角「五味嬪」，就好多嘢要講。噚晚10點幾同11點係咁出po，話: 「真不想說話，太累了額！只想負責任的說一句！沒有你們想的那樣的事！！更不是你們說的那個人！！我本來就有很嚴重的焦慮症額！！我隨便說說的話你們也信額！這幾天我被你們說的吃不下飯，睡不著覺！你們不要再罵我額！我錯了，也受到懲罰了額，對不起！！！」 ，之後再寫道: 「吃藥了！晚安！」 自爆患有嚴重焦慮症，唔知係咪施展苦肉計以減少被攻擊。結果被網民鬧爆：「禍從口出，管好自己的嘴和手，很多事都可以避免。」成千幾個留言，大部份都係鬧爆佢。

至於之前嗰啲爆料話發生過性行為、「和他奮戰到早上六點左右」嘅貼文，就全部刪晒喇，又強調消費嘅客人都係純粹飲酒，堅稱若互有感覺、一齊返屋企都冇問題；而且當日對方倒頭就睡，根本冇發生性關係。唔係喎，之前女方明明回應網民嗰陣話：「當然有愛愛喲！」係唔同場次記錯？定真係作大咗呢？

附上福爾摩fans長文一篇，為霍建華證清白，用心之作：
http://blog.sina.com.cn/s/blog_50861ae80102eb6r.html#bsh-24-292910497