每人都有一場瘟疫。

攀石教練黎志偉，高超的攀爬技術贏得「包山王」的稱號，曾幾何時他覺得世界都應繞着自己走：「我係香港，甚至全中國、亞洲第一、全世界第8名，喺我前面嘅人好少。感覺只要自己做到最好，攞多啲獎牌就得，根本唔使理身邊嘅人。」過份自我就如一場瘟疫侵蝕。2011年12月9日他如常駕着綿羊仔回家，厄運降臨，一場交通意外導致下半身癱瘓，開始不一樣的下半場。

早前黎志偉在沙田接受訪問，為電影《獅子山上》宣傳，電影根據包山王的經歷改編，不少都是真實情節，包括拍拖一腳踏兩船、傷後在的士失禁，黎志偉說︰「導演劉國斌問我係咪乜都可以講？我話係，冇理由淨係講你好勁好勁，冇黑暗面。失禁係真實經歷，嗰次喺體育學院做完訓練，為食走去食沙律，點知就出事。原本諗住搭巴士，知趕唔切所以搭的士。上車冇耐已經失禁，之後有陣味傳出嚟，自己冇辦法處理，係好尷尬。的士司機未至於鬧我，但真係會畀說話你聽。」

出事後沮喪是必然，特別對一位曾經以不足10秒，就攀上長洲太平清醮包山的運動員而言。受傷後他卻因此看到過往在頂峯時見不到的風光︰「而家多咗返屋企同老竇食飯。原來一直跑，會忽略身邊好多嘢，我唔敢話得着，係學曉珍惜。又好似多咗『超能力』，好似有種辨別眾生相嘅能力，曉得顧人哋感受，我覺得而家嘅係大愛，想將呢份愛分享出去。以前邊有諗咁多，『總之你唔好阻我攞獎』。」之後有遇過好人，亦見過如戲中邵音音演的中醫神棍、為贏官司不擇手段的律師林嘉華。

失去動力後另一場瘟疫降臨，包山王講到出事前後的心態改變，以前常常想人認出自己，他笑說︰「試過搭車有人睇緊份報紙，讀到一段有關我嘅新聞話『呢個包山王好犀利喎』，我仲扮唔知走去問佢『有幾勁呀？差啲想話埋佢知我就係嗰個包山王』。」到出事後靠輪椅出入，那段時間完全不想人認得自己︰「最好提都唔好提，開頭大半年時間真係好驚人認得。試過俾人認出，我驚到落車搭下一班。」浮浮沉沉5年，對家庭充滿歉意，怕老婆擔心又愧對兒子，不可以跟他「玩高高」。直到6年後他重臨獅子山巔，人，才完全釋懷，他說︰「諗通咗一件事，你識行識走、手腳健全又點？但係你每日都唔知做緊乜嘢，冇目標、冇夢想，積極啲嘅咪供車供樓養仔，之後點？每日都係刻板過生活，而我坐輪椅又點，我有幾多事要做呀？我想出書、我想做講座、我想拍紀錄片、我想爬獅子山、我想將呢件事變做一套電影。其實你正面諗就有一條出路畀你。」

黎志偉自言坐在輪椅上再上獅子山感觸很大，記得登頂一刻剛好看到日出，令他覺得在香港還有機會和希望，他說︰「嗰一刻我終於做番攀石運動員。如果你問我，今時今日有乜嘢對獅子山下嘅朋友講，我會話大家都要努力，唔好太多埋怨嘅聲音，努力去做好自己，活在當下。將來嘅路一定會雨過天清，一定會有一個好嘅未來畀大家，一定要繼續努力，加油！」

地地提供︰Hong Kong Climbing Park
採訪：何永寧
攝影︰陳俊強
攝錄：Ricky Yip 馮嘉銘
剪接：Anthony Chan

-----------------------------
《迪士尼公主大世界》
14位公主一書睇晒
-----------------------------
【撐學生】
召集有心人 撐學生全年睇《蘋果》
立即按此