趙先生（圖）是元朗譽88一伙特色戶的業主，他指，屋苑去年8月加管理費15%，他們家要交的管理費由5,200元升至6,000元，每呎近5元。元朗區現時車位租金約為3,000元，即該管理費夠租多2個車位。

至於屋苑會所設施，他表示：「部分設施需另外收費，但來來去去都係大路嘢，如健身室等。」有關七人轎車接送，趙生指：「當年賣樓時，發展商話提供七人車，後來到前年又反悔，將七人車服務歸由管理處管理，（發展商）唔理，即係營運費由屋苑管理去負責。我哋業委會（業主委員會）業主全部唔肯呀，因為根據售樓說明書（該服務）係免費提供，當時營運開支報價每月要成12、13萬元，要歸入管理費中，我哋話要去抗議先唔敢收，到去年又再提，但就變成每月5、6萬元，相差五成。」

趙生又指：「其實屋苑好多嘢『掠水』，因為呢間管理公司好多開支係自己公司有份維修嘅，例如水工、園藝等都係其附屬公司做，自己『左手交右手』，條數又佢嗰度出。」他爆料，屋苑入伙年半時，管理處就表示要更換大堂及升降機內的六部冷氣。他質疑，「唔通升降機用的冷氣都是舊的、是二手的？」他指，後來見住客不滿才改口成維修冷氣。

趙生指，發展商賣樓時表示有3年維修保養，但其私人泳池去水有問題，入伙至今三年都未處理好。他認為發展商「講一套做一套」，管理費又懷疑有「左手交右手」、「報大數」的情況，忠告準備入市的市民買新樓要小心。

記者：陳寶恩
攝記：晉平安

蘋果財經，關心你飯碗
http://fb.com/appledailyatm