外號OK哥之布文係近年香港國際賽常客，不過今年似乎唔太老利，首先「明月千里」退出香港盃，到剛周三（5日）騎師賽又大熱零分收場，幸好在非騎師賽之場次勝出「鄉村瑰寶」，全晚不致於空手而回。

不過布文始終都係一位高手，周日（9日）之戰依然得到唔少實力座騎，其中第一場四班1400米的「魅力知寶」，相信可為騎者先拔頭籌。

「魅力知寶」自從由羅富全接手後，除了一次因氣管多血大敗外，幾乎場場都跑得接近，奈何本身非常尺寸，因此連番與勝利擦身而過。

上季尾「魅力知寶」傷腳，休息超過半年才再跑，今季復出在守好位下，直路上田泰安一騎即閃，擺明狀態不足仍未上力，熱身一場後安排在大賽日出擊，今場先至係目標所在。

預計「智力寶」會係主要對手，此駒質素唔錯，但多次試閘起步都稍慢。「魅力知寶」則跑法機動，守好位之下可在最後200米走甩，其他馬就唔係咁易追，急求交代之馬值得睇好。