香港電視娛樂(nowTV)與香港電視網絡(hktv)只差兩個字，前港視藝人陸駿光直言差啲「中伏」，陸駿光今日喺電話哈哈笑話﹕「又fake一fake，我哋有個group，仲以為係港視獲12年免費牌，好興奮，點知原來搞錯。可能王生(王維基)玩得啩，愚人節咪玩吓佢囉。」

咁係咪會失望？陸駿光話:「都失失地望，希望now繼續搞，始終新台，如果搞對台前幕後係好事，佢哋要用人。」覺得王維基被擺上台？佢話:「少少，可能佢玩得，玩吓佢囉。」

劉玉翠就話﹕「都興奮，其實畀邊一間電視台，對我哋嚟講，自己係中立，畀多啲呢行嘅人出路，我自己係最關注。多啲工作就業機會，多啲創作，令呢個圈逢勃發展先係最重要，當然王生付出咗咁多，我哋都做過佢同事，咁成個唔識點形容.....唔識講，但會接受呢個決定，希望嚟緊電視台都會有好製作，刺激成個行業。」覺得王維基仲有冇機會？佢話:「呢個無得應唔應該喎，唔到我話事，因為峰迴路轉。」

艾威就話﹕「好事嚟，有少少擔心亞視員工，老細仲會唔會掉錢出去，講明唔續牌，啲錢明蝕，唉。唔多唔少有朋友，希望now快啲招兵馬，要拍定啲嘢。」同王維基有聯絡？佢話:「都有，早幾日有whatsapp。」覺得王維基被擺上台？佢話:「冇話擺唔擺上枱，我覺對佢無影響，幫佢股票升一升添。」會否覺得唔公平同失望？佢就唔敢作任何推測。