利嘉閣地產港島東區區域經理陳偉雄話,旗下藍灣半島分行啱啱升為高級物業顧問嘅李淑蘭,最近做咗單過千萬成交,係藍灣半島複式,重係屋苑嘅第一宗複式成交㖭。
陳偉雄講,買家係由熟客介紹,原住開西半山約一千呎單位,希望換大啲,第一次睇樓就好鍾意,即刻還價,同發展商傾咗五日。發展商兩個月前重叫緊千二萬,結果以一千零八十萬成交。單位係六座頂層D室,二千一百五十八方呎,係屋苑最大面積,重有個九百零七呎平台。發展商賣咗呢個單位之後,其他複式嘅議價幅度會收緊,可見十分惜售。
利嘉閣促成第一單複式買賣,有成二十萬佣。
中港城擲千萬推廣
信和動用超過一億翻新尖沙嘴中港城,第一期工程將會喺十月完工,聽信和租務部總經理陳昌傑講,到時商場會富歐陸色彩,計劃未來一年用逾一千萬做宣傳推廣活動,其中一項係中港跨境宣傳活動,費用過百萬。
第一期翻新工程包括將地下換上歐陸式設計,更換天花、地台同照明等。重新間過舖位,擴闊走廊,同騰出更多空間做表演場地。第二期工程主要改善中港城廣東道入口大門、改動同增加電梯等。
信和最近成功獲得十幾間店舖承租,聽講另外重有幾間著名零售商舖,日內達成租務協議。
中原有機會再分紅
中原上半年因有錢賺,向非營業部員工派發四分一個月花紅,已經公布一段時間,但集團主席施永青禮拜四喺公司網頁,專登舊事重提,原來重有下聞嘅。
老施話非營業部之前減薪15%,若下半年大家努力,公司有能力再派多啲花紅,隨時有機會補回全年減薪造成嘅損失,保住九七到𠵱家都唔使減薪嘅紀錄。
同時,老施又公布一批成績突出,值得嘉獎嘅營業部管理人員名單,董事級有王浩聰;助董級有周永輝同方啟明;區經級有鄭莉莉、林偉文同徐志華;分行經理級有黃文龍、李巍、鮑志德、李玉祥同麥成輝。原因係呢班員工在惡劣環境下永不言敗、身先士卒發揮最高團隊精神、事前有部署、有刻苦能力、同善於了解敵情並迅速作出回應。咁各員工識做未?