在重陽節前一晚，香港拳手曹星如對日本拳手前村龍斗一場蠅量級賽事，精彩緊張兼而有之。曹星如爭取20連勝，自然不會怠慢；日本拳手亦是新銳之師，何況拳怕少壯。本來我很少睇拳賽，不過，今次則應贊助商之一太興陳永安邀請，我問永安關於曹星如成名之路，佢話，星如曾經同佢講，自己本是廢青一名，大家想唔到的事他亦曾經做過，但在24歲時原力覺醒，轉打職業拳賽，僥倖19連勝，當晚打完就20連勝。星如說是拳擊運動將他從廢青群中拯救回來，他今日成就，真的是全港廢青的榜樣。跟着永安問我，有沒有人姓廢。

我以為永安問有沒有人姓費，於是話有，重陽節的主角也是姓費（粵音姓氏讀裨）；孔明本來亦是廢青，不過他原力覺醒，講出大夢誰先覺，於是未出茅蘆，天下三分已定，繼而效忠劉備。三國末期，孔明臨終前，蜀劉後主問孔明，如果他過身，邊個可以接任，孔明話蔣婉；後主再問，蔣婉之後是何人，孔明話費禕；後主續問，孔明想了一想，未及回答就已經死咗。這本來是一個不解之謎，但我估計，孔明想到，蜀國當時已經沒有年輕人材，只有廢青，全部都是廢青，連費禕個仔都叫阿青，孔明見全部都揀唔落手，不如死咗佢算數。

現在，香港有很多年輕人被人叫廢青，其實，佢哋唔係；只要搵到一條適合道路，以及有適當幫助，令他們原力覺醒，冇年輕人係廢青。

掌握財經生活資訊，即Like「蘋果ATM」fb專頁啦！
http://fb.com/appledailyatm