雖然話人哋嘅家事少講為妙，但新鴻基地產（016）副主席兼創辦人之一、恒地（012）主席李兆基，見到幾個世姪鬧不和，隨時震動祖宗基業，幾唔想出聲都要講句。噚日四叔再度開腔話：「其實但凡係富豪又或者大企業，子女一多就係煩啲囉！淨係諗要點樣喺公司裏面好好咁安置班仔女，就已經好考功夫！」

話明唔做「和事佬」

雖然李兆基冇舉到例子，亦冇解釋到自己點做，但華華睇恒地年報，大公子李家傑同二公子李家誠，喺旗艦企業恒地嘅職位都係副主席，喺「現金牛」煤氣（003）就一齊做非執董，喺私人投資旗艦兆基財經亦係一齊做董事，相信已經示範乜嘢係「好安排」。
話說回頭，四叔話事件搞成咁，對郭老太鄺肖卿嚟講，真係「手掌又係肉，手背又係肉」。佢仲爆郭老太今次真係好傷心，因為覺得自己好似做唔到丈夫──即四叔已故拍檔郭得勝──交低嘅工作。四叔仲話：「新地有咁耐歷史又做得咁好，成為數一數二地產商，實在好難得，如果因為（兄弟）不和而分家，大家都會有好大損失。」

花旗籲換馬長實

佢老人家𠵱家最希望係各方面可以有商有量，不過，佢就唔會做「和事佬」，始終清官難審家庭事，何況佢又唔係清官。四叔又話：「希望大家可以平心靜氣，一齊諗個解決方法，唔使搞到分裂，咁樣大家都冇好處。」
噚日花旗出咗份報告，叫人沽新地，換馬長實，原因係，家陣新地嘅管理層出現唔確定嘅因素，包括之前曝光嘅新地董事會討論文件中，提出郭炳湘17項不是，令新地管理層對郭炳湘失信心。仲有就係擔心新地家陣唔穩定，佢哋諗住今年推售嘅主打樓盤天璽，分分鐘要押後推盤，容乜易影響業績。
所謂「不聽老人言，吃虧在眼前」，四叔千叮萬囑三兄弟要和睦同處，真係有道理㗎！
電郵：mailto:[email protected]