成日俾人問佢選唔選特首嘅立法會主席曾鈺成，早前話香港作為一個國際金融中心，特首應該有國際視野，並對經濟金融有認識，咁啱得咁蹺，新華社上星期就同金管局總裁陳德霖（Norman）做咗個專訪。Norman肯定識經濟金融，市場亦傳過Norman有機會跑馬仔，睇嚟梁振英有好多潛在對手喎。
新華社早前推出「香江訪談」系列，獲國家主席習近平金手一握嘅財爺曾俊華率先接受訪問，講一帶一路嘅發展機遇，正當大家估計有人可能食咗酸葡萄，隔咗唔夠一個月，新華社就訪問梁振英嘞，照睇篇幅最威係佢，事關梁振英篇專訪有成3,500字，財爺嗰篇得2,200字咋。

被形容為「儒雅」

可惜轉頭就殺出陳德霖，Norman呢篇訪問都唔弱，有近2,700字，文首劈頭就話「儒雅的香港金融管理局總裁陳德霖」，用得呢個形容詞，證明陳德霖嘅形象相當正面，起碼唔係「技安」嗰類人；搵番財爺與梁振英嘅訪問，新華社形容財爺「富有卓見」，至於梁振英嗰篇呢，新華社話佢係「香港特區行政長官」，實在搵唔到形容詞，典解嘅？
講番Norman呢篇訪問，題目認真夠晒新鮮滾熱辣，就係講人民幣貶值。人民幣上星期忽然貶值，嚇到大家震騰騰，有上市公司仲即刻將人仔兌番做港元，搞到蝕幾千萬元。
Norman就派定心丸，指人民幣滙率形成機制邁向市場化嘅過程中，出現比以往較大波動係在所難免，中長線中國經濟向好，外貿穩定增長，人仔不應該持續貶值咁話。Norman除咗識幫人仔講好說話，1998年亦有幫手打大鱷，夠晒國際視野、金融經驗喇。
聞說Norman呢個訪問，今年6月中開始約，最近一兩個星期先至正式進行，訪問大約1個多小時。不過，花生友最關心，都係之後仲有邊位接受訪問，曾鈺成？梁錦松？還是心癢癢嘅葉劉淑儀呢？

李華華
mailto:[email protected]