李蘊(Renee)今日同內地男友羅章冠喺海南擺酒,好姊妹G.E.M.同何超蓮都有去,亦有相信係男家嘅親友放咗今早佢哋去到男方鄉下做儀式嘅相,見著住裙褂嘅李蘊成手都係金鈪,仲戴住鳳冠,著粉紅色衫嘅姊妹一字排開咁影相,十分之有氣勢。
近凌晨12點左右,幸福新娘子李蘊喺網上終於貼出佢同老公嘅合照,留言:「嫁人啦!我有老公啦!哈哈!今日好攰,聽日中午12點後再一一回覆大家!感謝大家祝福!好感恩!」
另外,好姊妹超蓮今日凌晨於Instagram寫道:「兩位超搭的左右門神負責守護著新娘子,Renee的幸福。」相中嘅阿G.E.M.同超蓮叉腰勁chok,扮護花使者。