樂隊Supper Moment同日本嘅中島美嘉，仲有台灣嘅徐佳瑩及泰國嘅Jannine Weigel等，噚晚喺會展出席《香港亞洲流行音樂節2018》， 其中為演出打頭陣嘅中島美嘉，負責演出兩首歌，佢喺翻譯陪同下接受訪問時表示，今次係第一次喺香港演出，佢話：「自己係一個好容易緊張嘅人，但對自己今日嘅演出都尚算滿意。」

對於香港嘅歌迷，中島表示：「日本嘅fans比較內斂，見到香港嘅歌迷就好熱情，所以喺台上見到佢哋歡呼覺得好感動，所以好希望遲啲有機會嚟香港演出。」佢又透露今次係首次到訪香港，可惜因工作排得好密，所以未有時間四出遊覽。

至於Supper Moment就負責壓軸演出，佢哋喺接受訪問時表示：「因為係今次亞洲流行音樂節首次有樂隊代表香港演出，所以預備咗一個好特別嘅演出。」嚟緊4月佢哋就會推出新專輯，佢哋話：「今次唱片有幾首新歌幾首舊歌，仲特登攞去美國做Mastering，係我哋目前為止最滿意嘅專輯。」成員阿達表示：「嚟緊會有三場香港嘅School Tours會做，稍後仲會喺大陸做十一場巡迴演出。」

而泰國嘅歌手Jannine就表示今次係第二次嚟香港演出，曾經翻唱國語歌《小幸運》而且獲得好高點擊率嘅Jannine，就透露事前向識國語嘅朋友學習咗一星期，覺得無想像中困難，如果有機會都想再挑戰國語歌。

另外，同場舉行嘅《超級新星大賽》，結果就由代表日本嘅女歌手Anly勝出，《最佳舞台演繹》及《人氣大獎》就由泰國男歌手TACHAYA奪得，而《最佳歌曲演繹》得主係韓國女歌手MINSEO。

精選娛聞，喺晒《娛果》
http://fb.com/appledailyent