那邊廂阿寶做奶粉生招牌，這邊廂師弟郭灝霆（Marco、右）噚日就搵埋「贏馬機器」韋達（左）大玩crossover，為今個月17號喺沙田馬場上演嘅香港打吡大賽造勢。雖然Marco噚日中午12點返到香港，僅逗留5個鐘就要返廣州，備戰印度亞錦賽，但啱啱25歲生日嘅佢，首次見到韋達同佢上屆打吡策騎嘅冠軍馬「陽明飛飛」依然好開心︰「第一次接觸冠軍馬感覺好得意，41歲嘅韋達雖然仲大過阿寶，但仲可以有咁多成就，真係好犀利同值得學習；之後有時間都想入馬場睇馬，但賭兩手就唔會喇。」至於亞錦賽，佢就希望衝擊未贏過嘅全能賽及團體賽金牌。