古天樂今日在灣仔出席保險活動，他表示拍戲曾試過被劍篤爆眼球、斷十字韌帶，很多意外發生，所以要及早購買保險。

古仔受訪時透露26、27歲已為自己及家人買保險：「拍戲間中有意外，除咗電影公司會買，我自己都有買，所以我不嬲都覺得健康重於一切，因為健康係用錢買唔到。」問他是否每年都會做身體檢查？古仔說：「如果一年能夠做到兩次，我都盡量做兩次，因為我作息唔同平常人，日夜顛倒，食無定時，成日飛來飛去，西醫話我一切正常，同埋兩年照一次胃鏡同腸鏡，因為我試過腸有息肉，好彩化驗咗冇事，可能同飲食有關。」提及古仔被發現在機艙食杯麵，他笑言：「我OK食杯麵。」

對於田啟文早前受訪曾提及市道太差，今年開戲是歷史新低，明年更是寒冬，不少投資者都未有開戲的計劃，古仔說：「其實各行各業都面對寒冬期，電影圈更加啦，所以需要政府幫手，投資者都要睇回報同風險，睇番社會狀況，就算我哋肯去投，但可能冇乜人有意欲去睇，其實都係一個問題，如果有政府幫手，就可以將成本減低，咁呢個就係一個新計劃要同政府協商，但都要同業界坐低傾一傾。」

提到有幕後的電影工作者已轉行做裝修、做的士司機等等，古仔表示知道有這個情況：「冇辦法，大家都要搵食，冇可能冇工開就唔做嘢，我接觸咁多幕後嘅工作人員，我發覺佢哋對呢行仲好有熱誠，只要呢個行業再次興旺，過咗呢個冰河時期，我覺得我哋可以做得更加好，但呢段時間大家一定要守望相助，亦都希望政府可以幫手。」問他會否減少開戲，古仔示意不談論電影公司事宜。

此外，王晶日前在微博宣佈預計明年電影《倚天屠龍記》新版，有傳古仔飾演張翠山、林峯飾演張無忌，古仔只表示曾有接洽過，但未有詳細透露細節。

採訪：黃曉妍
攝影：陳慧安

-----------------------------
蝙蝠俠誕生80周年
點擊即睇85頁經典大回顧
-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇