早前提過貝湯美未有打好大摩主帥這份工，但練者揚言力撐，不過新近又有「鷹雄」之前在貝湯美胯下表現膠着，一換潘頓即交出凌厲後勁捧走一月盃。

再者，就算大摩如何口硬，近期上名的摩廐馬亦以非貝湯美座騎為主，似乎有人開始口不對心。

回說今次（13日）賽事大摩五場有馬出，貝湯美只分得兩駒，顯然這對將帥合作關係，逐漸進入緊張階段。

始終摩廐今季暫只贏12場賽事，完全跑輸大市，也要想辦法追數，在形勢所迫下，最終可能要用「棄帥」一招，且看後事如何。

第三場摩廐「多紅利」，開鑼日（去年9月3日）交出22秒1快拉士贏今戰直路賽，亦為摩、貝組合季內首場頭馬，但今次該駒寧願改配韋達，相信與打後四次貝湯美騎「多紅利」早段俱留得太後有關，過了400米處，最近一次仍處第10位，要後發先至談何容易？

連吃敗仗後，「多紅利」今次較開鑼日勝出同程時還評低一分回復優勢，韋達向來唔鍾意留得太後，正合該駒所需，大摩唔用貝湯美，不妨解讀為馬房更具爭勝決心。

至於另一摩廐馬第二場「確威風」季初兩次上名俱起步留住，但近兩次配潘明輝，卻早段刻意力騎搶前末段轉弱，如覺得是小潘發揮有誤，大摩應不會連用三次，倒不如解讀為馬房早前旨在減分兼且試馬。

以「確威風」去年10月跑三班田草1200米以後追跑法，不過落後贏「五十五十」的「萬馬奔騰」兩個馬位奪季，今次頭段肯俾耐性，要贏四班賽可謂綽綽有餘。