自去年意大利籍領隊干地入主車路士後，以英超較少見嘅三後衛陣式（3-4-3）橫掃奪冠，令不少英超球隊如阿仙奴、曼聯、熱刺、史篤城彷效試踢三後衛，然而佢哋踢出嚟嘅成效，不及專為三後衛陣式而打造嘅藍戰士，甚至有球隊近期已重啟四後衛陣式，相信這種三中堅嘅風潮，將難在英超延續。

去季車路士嘅成功，很大程度歸功於干地這名「老師傅」，由於佢喺意大利國家隊同祖雲達斯都有成功嘅經驗，明白到三後衛陣式需要甚麼球員，去季引入的大衛雷斯和馬高斯阿朗素，都在三後衛陣式下脫胎換骨。觀乎雲格、摩連奴、曉士等人，唔係話佢哋功力唔夠，但始終係三後衛陣式嘅「新手」，球隊變陣後跌跌碰碰亦在所難免。

其次要改踢三後衛陣式，中堅儲備數量十分關鍵。觀乎車路士嘅陣容，至少有五名實力相當的球員可任中堅位置；反觀踢開四後衛嘅球隊，最多只會有四名主力中堅，當防線一旦遇上傷病問題，如曼聯嘅艾歷拜利、熱刺嘅艾達韋列特要長抖，根本不像車路士般有充足儲備，繼續維持三後衛陣式，變陣成惟一可行之法。

另一方面，三後衛陣式更需一對高質素翼衛，為球隊統治邊線。然而，部份球隊竟以「替工」擔當這位置，如阿仙奴季初起用阿歷士張伯倫、史篤城起用前鋒馬美迪奧夫當翼衛，他們雖為球隊增強攻力，但防守不力的特質導致兩閘常有漏洞；當兵工廠重用比利連和哥拉辛拿斯擔任翼衛，才令防線重拾穩定。故筆者認為，三後衛陣式需要適當的陣容配合，不是任何球隊可輕易複製。

文：尊嘉

--------------------
狂賀！BFB系列推出5周年，精彩活動為您安排，立即登入速享專屬優惠！ http://bit.ly/2xrTKGM