呢份綠色封面預算案唔派糖,原來加足料含睡意配方,少啲精神都頂唔住,公民黨黨魁余若薇撐到半場終於投降,八方見佢開始釣魚,自得其樂,至於佢同梁耀忠邊個收穫豐富啲,八方就唔知嘞。民建聯黃定光原來已練成靈魂與肉體分離神功,得以脫離呢個催眠煉獄,令人羨慕。
民建聯葉國謙果然係建制派頭領,乜事都算到社民連頭上,佢噚日話,議事堂冇咗社民連三子,大家當堂耳根清淨晒。事實上噚日會議波瀾不起,冇人掟蕉抗議,如果鬍鬚曾收聲,隨時蚊飛都嚇親人,唔怪得議員咁好瞓啦。為免再出現類似場面,鬍鬚曾將補選開支同預算案「綑綁」,讓社民連重返議會,真係有先見之明而且好明智,明年預算案最好預留款項供議員買鬧鐘,為人為己,呢啲錢唔慳得。
mailto:
[email protected]