大陸富婆Laura同女製作人汪子琦嘅同性婚姻今年5月劃上句號，今晚Laura有份到場飲喜酒，講到佢同新娘江若琳嘅認識，Laura話：「當年我投資部電影，Elanne(江若琳)做女主角，佢哋兩公婆好sweet，就算食飯都拖住手仔。」Laura話會送份好特別嘅禮物畀一對新人。

講到上個月畀人影到佢同汪子琦一齊喺美國睇李克勤演唱會，Laura話：「係撞到，我哋係分開去嘅。」記者話佢哋好有緣，點知Laura話：「係唔好彩。」記者話以為佢哋復合，佢話：「你哋諗多咗。」問佢會唔會有機會復合，佢搖頭話：「No。」佢話自己感情生活未有着落，想2019年有新戀情，所以今晚過嚟婚宴沾喜，而聽日會同朋友去台灣玩，之後再同朋友去上海倒數。

精選娛聞，喺晒《娛果》
http://fb.com/appledailyent