昨日個市似強實弱，上半場低開200幾點後再挾升，當全城追貨之際，3點後就隊返轉頭。值得注意的是，午市初段恒指倒升，但唔少當炒股（手機、科網、資源股）已無力再爆，末段更回得相當急，托派的味道甚濃，戰友不可不察。

退一步去諗，呢兩三日升市其實欠缺利好因素支撐，話強國PMI好掂，但A股表現僅一般。美股周二復市未隨亞洲股市大升，更是響起警號，加上歐洲都冇力，美國10年期債息又升近2.9厘，唔排除市況再度逆轉。
另外，資金持續流出印度，加上油價居高不下，勢令依賴石油進口的印度經濟百上加斤，迫使央行大舉干預匯市。一旦資金再撤出新興市場，勢將火燒連環船，中港股市難以獨善其身。
強勢股當然仍睇高一線，近排推介的績優股，如亞太衛星（1045）、金山軟件（3888）、精電（710）、同方泰德（1206）昨均創一年新高；舜宇（2382）、四環（460）、富智康（2038）、銀娛（027）仍有力，但炒股要居安思危，先鎖定部份利潤冇壞。
水泥股炒復蘇，中線之選為華潤水泥（1313）。受惠水泥銷售大增及匯兌收益，中期業績按年大升80%。瑞銀預期下半年盈利可再一層樓，較上半年增長33%，現價預測PE僅12倍，睇15倍PE，可上望6.20元，建議可於4.80元附近介入，水位29%。

魏力
http://www.facebook.com/2012jason

有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange