【金手指】誰想美疫情大爆發？（孫柏文）
蘋果日報 2020/03/02 21:00
孫柏文金手指
禮拜日，全球市場參與者好似個啱啱斷酒嘅酗酒患者咁，諗住聯儲局同其他央行一定又大開香檳、烈酒，減息慰市。點知冇料到。
原先禮拜一喺亞洲開市時，跌到七個一皮，點知到臨收市又扯咗上去。雖然孫柏文落筆呢刻，美股未開市，不過我估美股應該會跌到好甘（除非聯儲局做嘢），令禮拜二港股裂口低開。
點都好，今次聯儲局會好難搞，因為當今次係供應鏈同消費者有錢都驚冇命享時，唔好話減息，就算學我哋偉大嘅特區政府派錢，都係唔會有人敢出街使。而就算網購，啲網店一但賣晒啲貨，一樣返唔到新貨賣。到時剩番嘅嘢只會價格飛升，通脹極差。
而對炒鬼最壞嘅情況，就係當聯儲局將僅餘嘅子彈，喺呢刻都射埋時，而個市都因啲公司本身運作大受阻外，股價繼續跌，就會赤裸裸被揭無能為力。到時就真係悲劇式跌幅嘅序幕。
小熊維尼可以繼續人為托市，不過當大陸公司嘅美元債到期，大陸啲銀行又因出口商瓜晒冇美元入，聯儲局又唔印去救，咁點呢？真係97年印尼、泰國嗰隻。
所以，大陸真係想美帝都大量染武肺，或者冇咁黑心，起碼想佢哋快啲做到大規模測試。等當美帝知自己病人數目有幾嚴重時，聯儲局都會被侵侵鬧爆後，唔理通脹，印咗先算。
不過，一向道指是一切嘅特朗普，今個周末開始醒覺事態有幾嚴重。因佢開始明，只要國民覺得佢盡咗力抗疫，股市都冧，其實唔關佢事。甚至可以順水推舟咁一鑊打爆依賴大陸製造業嘅情況。
都係嗰句，除非有藥醫，否則清了倉的我，一股不買。