巴塞隆拿周二西甲大炒伊巴，四喜臨門嘅美斯自然搶鏡，但另一焦點係今季新加盟嘅巴西國腳荷西保連奴，亦連續兩場波取得入球，似乎令唔少早前睇死佢係水貨嘅人，大跌眼鏡。

保連奴之前踢唔掂熱刺，結果喺兩年前去咗中超投靠廣州恒大，好似降呢做山寨王咁，但亦因此令佢可以重返巴西國家隊。適逢巴塞今夏想加強返條中場線，用咗約3,600萬鎊價錢將佢帶返歐洲，但好多人都唔睇好佢，認為佢連熱刺都踢唔掂，又點踢巴塞呢？甚至連前巴塞中場指揮官沙維都出聲，話保連奴嘅踢法唔啱巴塞。

不過，保連奴家陣爭返口氣，連續喺上周對基達菲同今場對伊巴建功，今次更加係用佢最耍家嘅頭槌功夫，接應角球頂入。現時效力PSG、曾係巴塞近年最強右閘嘅丹尼爾，賽後都喺ig為呢位巴西同胞抱不平：「嘩！保連奴有入波喇！巴塞今次真係簽咗一位超值嘅筍貨。」

3,600萬鎊算唔算超值，見仁見智，但至少有入波做到嘢，相反同保連奴身價差唔多嘅阿歷士張伯倫，就喺利物浦沒那種命，仲被冠以終極黑腳嘅封號。