馬季步入尾聲，季內最叫人始料不及應係有部分被睇好的騎練，成績令人失望，數騎師肯定有貝湯美與祈普敦份，前者點講都係G1大賽常客，2013年馬季四月底來港客串短短兩個半月已贏22Win，成為大摩的御用G1殺手，誰想到現時竟於谷底掙扎？

與貝湯美同屬悉尼冠軍見習騎師的祈普敦，情況也同病相憐，上季首度來港發展即以40Win進佔騎師榜第五名，今季理應更進一步，但事實卻相反，陣上屢見進退失據令支持度大減，現時只贏得17Win，周日（3日）因策蔡廐「西方快車」遠征日本安田，多匹打理開的座騎易手。

其中第八場「飛霸龍」季初在其手上能殺低已81分「美麗寶貝」打疊兩Win，盡顯潛質，之後竟不進反退，尤其前仗谷草1200米祈普敦發揮「非」一般，今戰換鬥志無比的沈拿，目前65分怎可能不夠爭？

另外第三場初出馬「機智神駒」，到港後一直由祈普敦主操，去到出賽呢一刻換上潘頓，雖未跑過實力如謎，但試閘走勢不差，只知配潘頓戰鬥力倍增。