已經宣佈參加九龍西補選的劉小麗，預料星期二搶閘報名，今晚會結集不同民主派，喺報名前舉行集氣大會。佢早前聯同盛傳係佢一旦被DQ後嘅Plan B工黨李卓人組成「麗人廚房」，之前教完大家煮愛心意粉，最近又走訪位於太子嘅良心小店基隆茶餐廳，同民協副主席、深水埗區議員楊彧，一齊示範煮紅棗桂圓黑糖薑汁湯圓。八方睇過片，發現小麗煮湯圓時都算熟手，只需阿人從旁提點佢要加多片薑。佢哋煮好後，就同基隆茶餐廳老闆Cat姐一齊分享，了解下呢間良心小店點樣用平靚正食物撐基層。

Cat姐透露，其實呢間小店開咗11年，幾年前開始定期派齋飯畀區內嘅公公婆婆，但最近就慘遭加租，由每月5萬5千元加到7萬5千元。雖然被加租足足2萬元，但呢間小店仍然有賣每個只需29蚊嘅飯盒。Cat姐解釋，因為餐廳附近好多基層工友同學生，為咗照顧佢哋需要，所以即使加租後十分難捱，小店仍然堅持派食物俾長者、露宿者，難怪小麗同阿人訪問Cat姐其間，唔少佢哋身邊嘅食客都大讚Cat姐好人，所以成日去幫襯。

立會補選新聞，《蘋果》一網睇晒
http://bit.ly/appledaily1125