新股建滔板（1888）及中通信（552）首日分別升15.5%及85.5%，立即引來唔少網友追捧，由於兩股嘅保薦人都係高盛，連同樣係高盛負責、剛公開招股的興達國際（1899），網友都認為可以睇高一線，值得認購。
《香港討論區》網友apieceofcake說︰「最佳保薦人非高盛莫屬，佢負責嘅興達，應該有得諗。」即使有人指興達基本因素差勁，盈利開始下降，又睇唔到有前景，網友指只要保薦人係高盛，就非常放心。網友kentaki更話︰「信高盛就掂，睇嚟興達可以一抽。」

時勢有別升幅各異

翻查今年高盛作為保薦人嘅往績，負責協助過上市嘅新股，包括先進半導體（3355）、中國銀行（3988）及世茂房地產（813），股價首日分別升32.8%、15.3%及5.6%。對於3隻新股首日升幅有別，同當時港股市況及外圍經濟環境有密切關係。先進半導體係4月7日上市，因當時已有大量熱錢流入本港，推高貴金屬材料股及地產股，大市暢旺，單喺3月中至4月初恒指已升近3.5%，加上有高盛效應之下，首日升逾30%。
至於中行及世房分別於6月初及7月初上市，首日表現較遜色，主要係當時金、銀、銅等原材料暴跌，熱錢趁高位沽貨，內地又有宏調措施推出，加上市場擔心美息上升，令到當時港股急速轉弱。5月22日恒指更大跌508點，跌幅達3.1%，係當時兩年嚟最大嘅跌市。即使如此，中行及世房首日表現都冇受到重大影響。