2004年港姐冠軍徐子珊和2013年國際中華小姐冠軍鄧佩儀，今日齊齊現身海南島出席「國際中華小姐競選2020中國站」記者會，大會透露今次接受網上申請，即日起接受報名，並邀請一班大陸網絡紅人到場取經。

分別參選過港姐和華姐的子珊，受訪時稱曾任華姐評判，覺得佳麗們台上台下表現會很極端：「一啲會好緊張，但上到台就好淡定，好似個舞台屬於佢嘅咁。」至於子珊自己當年參選時屬哪一類別？她笑說：「我當年係緊張，但扮自己屬於舞台嗰類，其實緊張到震晒。」

近年重返校園報讀心理學後，子珊直言懷疑自己有「人群恐懼症」，不但商演時會緊張，就連在校園簡報時也很緊張：「有時我寧願唱歌都唔想做present。」問到是否要唱首本名曲《Hit Me》？她笑說：「咁又唔得喎，真係唱唔到喇。」子珊又稱為趕在星期日交論文，今日帶上電腦出席活動，珍惜一分一秒去寫論文：「大約8月就知可唔可以畢業，我其實想繼續讀博士。」對於有傳林峯將於12月生日迎娶女友張馨月？作為林峯好友的她說：「唔知喎！如果係真當然戥佢開心，但我唔八卦，唔會刻意問佢。」

至於鄧佩儀表示自從參選後，身邊有很多朋友都陸續報名：「佢哋好多都好靚女，有啲仲唱歌好好聽，因為睇到成個參選嘅訓練過程學到好多嘢同好好玩，但係佢哋全部都喺溫哥華嗰邊參加。」

鄧佩儀憶述當年自己19歲參選，回想起全憑一股衝勁，現年26歲的她說：「如果而家我參選，可能會有好多考慮，例如安頓好屋企人先，但當時完全冇諗過呢啲。」提到早前她在IG上載泳衣照，然而，有不少網民大呻為何只得一件頭泳衣，而不是比堅尼，她笑言：「我遲啲要去斐濟拍節目，會積極考慮吓到時着，但我希望呢排再努力啲Keep Fit，因為我想有馬甲線。」

-----------------------------
7月4日起 《蘋果動新聞》只限升級壹會員閱覽
繼續撐蘋果！