祈普敦暫贏20W，只有三匹大熱門比例超低，惟解讀數據，不應睇片面，皆因數字未滲入騎大熱門總數，結合起來，原來跑246場，只有八匹大熱門，宏觀標準原來也不差呢！不過卻仍要歸類為冷門騎師。

第七場三班1400米，祈普敦接手姚本輝的「龍船鼓響」帶來變數，姚本輝早在上月尾已找他過檔，睇晒由其主試的快操、大閘，顯然收服到佢。

不介意11月曾缺課約兩周，自回復正常後，已有兩個月準備時間，對此弱馬而言已甚足夠，睇早前試閘走勢，確認狀態比季內兩場都有過之而無不及。

回看季內兩戰，一定睇到田泰安、蘇兆輝點騎，碰巧此兩仗都遇慢步速，前次掟大彎，上次塞車，直路騎幾多步，完全可從賽事片睇清楚。

今次小休復課，換人，轉抽內檔，縱不肯定同場預計會領放的「好愉快」，會放幾快？若快固然好，如不快，也只要不偏慢，人馬有正常發揮，絕對有權跑贏同場數匹熱門。

熱門正路馬中，最硬淨的是「帝豪寶寶」，經過兩場同程快、慢步速，對手轉換的考驗，確認戰鬥力持續升呢，抽1檔又夾其跑法，唔飛得。

「金剛之星」上次已有揀，理由是檔位由外轉內，復課持續地變好，用羅理雅排4檔，條件亦不差。「運財童子」上仗鬥輸給「好愉快」，一齊上班跑，仍信前駒，首先有路程證明（負頂磅初跑同程也入Q），這次如釋重負，再進唔奇；反而後駒來港三季有多，從未打叠上名，無法唔放棄。

「永勝神駒」加眼罩好壞未知，本月21日試跑後又無再快跳，疑問多。「閃耀鑽皇」排外檔，內側多相近跑法馬，用巫斯義更要預八、九成走外叠。「喜得福」三班唔夠贏。