【新增動新聞】
德國、智利會師洲際盃決賽！周四洲際盃4強，德國憑哥列斯卡早段梅開二度，加上迪姆華拿同艾文尤尼斯各入一粒，4:1大勝墨西哥，下周一同智利爭冠軍！

雖然德國今次未有召入紐亞、奧斯爾等主力，分組賽表現亦缺乏霸氣，但一眾新星嚟到淘汰賽展現「日耳曼本色」，6分鐘就憑哥列斯卡策動反擊，再接應軒歷治斯傳中撞射破網領先1:0；呢位史浩克04中場兩分鐘後再接應迪姆華拿直線，快墨西哥「Sam哥」門神奧祖亞一步射入，德國半場領先2:0。

換邊後德國再憑一次小組入滲撕破墨西哥防線，59分鐘達斯拿直線傳畀祖拿斯赫達，後者再造就華拿撞入空門，領先至3:0。雖然墨西哥89分鐘憑馬哥法比安接應快開罰球，離門35碼勁射「拉西」收死達史特根破蛋，但德國補時再靠艾文尤尼斯接應安利簡恩傳送射成4:1完場，殺入決賽同智利爭冠軍。兩軍喺分組賽碰頭時踢成1:1，德國喺足智彩冠軍賠率稍為被看好，有1.8倍，智利就為1.9倍，墨西哥周日就會同葡萄牙爭季軍。