呢幾句話係告誡國家領導人、將領不可因憤怒而向外宣戰。美國自九一一之後，舉國憎恨阿蓋達，火遮眼，打阿富汗猶可，打埋伊拉克就可能因為小布殊要為老父完成未竟之壯志，執意行事，如果佢或者佢嘅謀臣睇咗孫子呢四句，向中東興兵就會慢慢拖吓先。
打仗唔可以亂嚟，孫子曰：「怒可以復喜，慍可以復悅，亡國不可以復存，死者不可以復生。故曰：明主慎之，良將警之，此安國全軍之道也。」大家緊記斯言。
講番大哥大與女士之鬥爭，好明顯，有人慍而致戰，不合於利而動，故意挑起火頭，逼大哥大用名譽掃街。如此一來，大哥大單身匹馬，無後顧之憂，為爭啖氣，爭番名聲，反為容易埋身肉搏，佢嘅對手就有包袱嘞，正是：「前後不相及，眾寡不相恃。貴賤不相救，上下不相收。卒離而不集，兵合而不齊。」（孫子十三篇九地篇第十一），亂成一團，士氣渙散，就算打贏，都已傷身，試問為何要打呢場硬仗？將不可以慍而致戰，乃千古名言也。