武漢肺炎肆虐全球，加上香港政府抗疫無能，全港市民人心惶惶，而本來已在寒冬狀態的演藝界，幾乎被冰封，無論是天王還是天后，工作同樣要煞停，受影響的還包括「人氣王」姜濤，以及其所屬男團MIRROR。

姜濤原定今年4月會赴台灣拍偶像劇，為原來已順風順水的事業再推前一步，惟因為疫情不斷擴散，港府仍然不肯全面封關，最終台灣宣佈加強入境管制，過去14日內曾入境或居住在中國大陸的外籍人士都禁止入境台灣。未知姜濤對接下來的工作是否都感到憂心，日前在IG貼相貼文抒發，留言寫：「有太多的不確定，願一切可以順利，我都嫌自己煩了。」

就此事《蘋果》聯絡姜濤經理人黃慧君（花姐），她回覆時承認疫情確令姜濤及MIRROR工作都受影響。花姐說：「姜濤套劇原定係4月開工，而家延期到5月後，但唔係完全同疫情有關，係當地劇組嘅決定。」

有指台灣加強入境管制，對劇組受到一定影響，而且政策未知何時才會取消，花姐直言不能擔心太多：「都冇辦法，惟有再睇下情況，其實Anson Lo（盧瀚霆），Stanley（邱士縉）遲啲亦要去台灣拍另一套劇，佢哋都好擔心，始終唔希望失去一個可以去外地拍嘢嘅機會。」

花姐透露，她已下令成員們工作以外要減少外出，又稱姜濤和Anson Lo原定3月會推出新歌，但現在宣傳計劃有阻滯，「佢哋當然會唔開心同擔心，原本諗咗啲宣傳、訪問同記者會，而家全部做唔到，但唔想增加風險冇辦法，惟有轉去網上做，我叫咗佢哋平時冇嘢做唔好周圍去，要留喺屋企。」

此外，MIRROR原定5月初舉行的兩場演唱會將會延期，花姐解釋：「講真Star Hall方面都唔想我哋5月開，而家暫定延期到8月，希望到時天氣熱啲，疫情可以放緩。」

至於Anson Lo在內等大班成員拍攝中的劇集《男排女將》，花姐指拍攝進度亦嚴重受阻。她說：「好多場地都唔開，所以暫時盡量拍住其他戲份先， 劇組都好小心，每次都會確保所有工作人員健康狀況無問題先開工。」有指取消大量工作，可有影響收入？花姐即哈哈笑道：「咁呢樣又冇乜喎！因為我哋不嬲都冇乜錢賺，唯一係呢樣嘢無影響。」

採訪：曹家誠