從前有隻獅子，威猛非常，但係呢十年，已經變咗做lazy lion，踢都唔郁，而年頭被封印之後，直情中埋武肺，奄奄一息，應該係奄奄冇息至真。禍不單行，上月初再嘗海嘯沒頂。早已心繫陸民嘅佢，完全體會到一眾陸民所面對嘅江河水患之苦。曾經也是大象之身嘅佢，短暫伸出象鼻透氣，可惜呢幾日又再沽雲蓋頂，潛返入水。

好喇，故仔講完，入正題。 呢隻lazy lion，大家一聽就知我係講緊滙豐（005）。佢嘅前景有幾差，相信唔少股評人都已經講過，簡單總結一下，疫情令全球經濟疲弱，環球低息，令息差收窄；政策失誤，兩面不是人，背負着隨時被批鬥制裁罰巨款嘅風險，未來盈利絕對不被睇好。當然，唔派息，亦都係佢股價受壓嘅最大原因之一，就算再多幾個同㐂婆條頸一樣咁硬嘅散戶力撐，始終都敵不過一啲需要有穩定派息嘅退休基金大戶，因為換鹿其他收息股所形成嘅龐大沽壓。

云云收息股中，以本人愚見，領展（823）不失為其中一隻非常好嘅「息」途老鹿。 第一點令我諗起領展嘅，就係佢嘅派息政策。話說當年政府將資產賤賣俾領匯（以前個名），其中一個條件，就係要佢承諾派息。你會問，喺油價都可以負嘅年代，無嘢係保證嘅，就算派，佢大可以膠派俾你，無錯，佢真係會「9派」俾你，因為根據房地產投資信託基金守則，係要求佢於每個財政年度，分派不低於90%嘅可分派收入。

唔止咁，其實佢一直唔止派9成，自上市以嚟，佢都係分派10成嘅可分派收入總額。詳情可參閱官網「常見問題」的「投資於領展有什麼好處？」。至於息率4厘幾，一年派兩次息，比滙豐一年派4次（以前），大家可以自己衡量一下。

當然，買股票，邊個唔想賺埋個價，要睇股價有冇得升，咁即係還原基本步，要睇吓佢嘅盈利前景同基本因素。數字嘅嘢，我就無謂講啦，自己上網search。都係講返貼地少少嘅嘢。話說筆者有日見完客，已經係晚飯時間，途經領展商場，是但搵咗間茶記食飯，作為樓奴嘅筆者，睇完個餐牌，只係敢叫個50零蚊連凍飲嘅晚餐，點知坐隔離枱嘅阿叔，踢住人字拖行人嚟，一坐低就嗌咗個蒸魚小菜套餐，有例湯，有啡走，埋單要$78（嗌凍飲要$81）。

呢件事，反映咗啲乜？試諗一下，其實搵幾皮嘢但大半份人工攞嚟供樓嘅人，消費能力未必比搵皮零兩皮嘢，但交幾千蚊租金住公屋嘅人強。學file博士話齋，有好多，仲要係早年以超低價買咗自己間公屋，當然冇攞去按樓賭錢，身家閒閒哋幾球嘢嘅幸運兒，財富效應下，消費能力絶對唔係講笑。

另外現今社會乜都講大數據，公屋人口數目龐大，再以領展分佈全港嘅商場網絡，佢收集返嚟嘅數據，絶對比起一間吉X島嘅數據，可以更加準確，更加有效咁運用。例如同一個商場裏面唔可以多過幾多間同類店舖？邊個屋邨人口老啲？要多啲邊類型嘅舖頭？佢都瞭如指掌。當中嘅協同效應同減少惡性競爭嘅策略，為商戶帶來更加準確嘅定價，喺消費者身上真係日日賺到盡。

有分成機制嘅租金政策下，真正賺盡一分一毫嘅，當然係領展佢啦。同時亦唔難發現，好多新屋邨隔條街已經係私人屋苑，仲要係豪宅嗰隻，所以佢嘅客戶群真係窮人有錢人，乜人都有，食盡八方。其實佢同誠哥一様，早一兩年都放咗唔少物業，例如兩年前就高價賣咗屯門嘅友愛商場，變相有出售投資物業收益；而放盤得返嚟嘅錢，當然又係同誠哥一様，投資唔少喺內地以及海外。今年4月就完成收購咗澳洲嘅某大商場連甲級商廈，上月尾又完成收購英國嘅辦公室項目，佢哋公佈嘅「2025願景」提到，未來會繼續投資有「良好法律體系」嘅海外地區。業務地區分散，喺今時今日地緣政治緊張，香港隨時成為炮灰之下，不失為另一賣點。

最後都要講下股價，領展上年差啲變身紅衫魚，而52周低去過54蚊7。現時65蚊左右（未夠食蒸魚），比歷史高位下跌3成，短線會點，我真係唔知，但對於不嬲都係長揸唔放嘅滙豐股民，改揸領展，長線升得返上歷史高位嘅機會我認為就高好多喇。

大膽講句，滙豐升得返，都只會係跟住大市升，唔通大市升，領展會掉轉頭跌咩？加上如果疫情有朝一日消失，啲人報復式咁出嚟消費，收租股一定第一時間跑出，其實唔好話滙豐災民，對於普通股民，如果係長線投資，依家都算係買入時機。

最後，講多個故仔俾大家聽。其實領展想當年能夠成事，同2003年沙士疫情有關。因為沙士之後，政府想改善公共屋邨嘅衛生環境，所以加快咗領展上市嘅步伐，希望盡快落實引進私人管理。17年後嘅今日，雖然公屋嘅衛生情況真係改善咗唔少，但係做唔做到防疫，事實證明同邊個去管理街市係完全冇關係。反而邊個去管理香港先係最重要。一個又廢又政治行先嘅政府，唔肯封關，疫症一樣可以肆虐，奪人性命。完！

利申，本人並無持有上述兩隻股票股份，更加唔會持有好類似領展嘅孖6，同埋冇做全民檢測。

謝比特

-----------------------------

【全球樓行】 Dream House零距離

屬於香港人的移民攻略

-----------------------------

上車必讀天書 「九成按」入市懶人包

點擊即睇《按揭必讀手冊》電子書

----------------------------

支持蘋果深度報道，深入社區，踢爆權貴，即Like蘋果專題及調查組FB專頁！