【止戈制暴】黃秋生提醒年輕人：你對抗魔鬼時好容易會變成魔鬼
蘋果日報 2019/09/06 16:20
黃秋生香港演藝學院白色恐怖下何去何從
香港演藝學院首屆畢業生黃秋生，今日應演藝學院學生會邀請出席座談會，以「白色恐怖下何去何從」為題與學生、校友等一齊分享感受，現場有人大嗌：「時代革命！」
秋生一開始便表明自己好愛國：「我好愛國㗎，你一送中，人哋取消你個特殊地位，香港就玩完，如果香港玩完，對於我哋祖國嘅經濟好大影響，因為我哋愛國，所以我哋要反呢個送中。」搏得全場掌聲。提到近日「撤離」Facebook，秋生強調是私人及情緒問題，他自嘲有人質疑他收了錢：「收咗錢仲唔走咩？！我起屋啦，戇居，仲同你喺度講咩。言論自由係人民同政府嘅契約，喺我個FB入面係冇言論自由，因為我同佢哋係冇契約。」
同學踴躍提問，有人問秋生愛國和港獨可否同時存在？覺得自己是中國人還是香港人？此刻會選擇愛國還是港獨？秋生亦大膽發言：「港獨，我真的唔係好清楚個理念，即香港獨立成為一個國家叫港獨，抑或香港高度自治叫港獨呢？根據上面理解有身份證就係港獨，咁全場都係港獨喎，幫香港發聲又係港獨，唔同意我又係港獨，從咁理解係人都港獨啦。但從國家政治、經濟、軍事獨立嚟睇，事實上，我又睇唔到香港好容易可以做得到。
「愛國，我嘅身份認同呢，我而家係多謝年輕人，令到我覺得自己係一個香港人。呢件事令我十分震驚，所有人出嚟，有好高情操。至於愛國，又係定義問題，我心目中嘅一個傳統中國，係忠孝仁義、德智禮信。如果我將成件事從另一個角度去睇，如果我做藍絲嘅觀點呢，將人去擬人法為曱甴、垃圾、廢青呀，但我唔同我係人嚟，所以我殺嘅係曱甴，咩唔打得你？唔搞得你？我唔可以用粗口鬧你呀？如果做中國人做到咁，我話唔係，但喺我心入面，理念上係愛我嘅中國。」
社會普遍認為警察失控，有同學贊成「以暴制暴」，秋生卻不認同，覺得應該「止戈制暴」，應該追究，但亦要學懂原諒。他說：「尼采有句名言『當你凝視深淵，深淵也在凝視你』你對抗魔鬼時好容易會變成魔鬼，仇恨可能會令你做錯一啲嘢。」秋生更不認同警察家人受牽連，他說：「即係你強姦我個女，我姦番你阿媽，關人哋老婆個仔咩事，呢點我唔能夠同意。失戀都要食飯㗎，人生一個挫折就瓜老襯呀？人生由細到大咁多嘢，有排你受，成件事點會打十年廿年，梗有一日會坐低解決。所以個政府真係白痴，唔通個仔唔食飯摑佢2巴，講粗口摑佢4巴，仔唔返學摑佢8巴，摑到牙都甩面都腫埋，跟住摑到佢痴痴呆呆，腦殘再摑X多你36巴，仔都瓜埋。香港都死埋，你仲做乜鬼嘢特首吖，你收皮啦！」
秋生感覺有人想刺激雙方，政府亦控制不了警隊，他說：「我懷疑而家政府都控制唔到啲警察，嗰3萬人已成為獨立小圈子，自己鍾意做乜就做乜，我覺得政府首要解決呢班山賊政權，現在又變番以前圍村咁，我覺得問題係嚴重過同市民傾，暴力失控，直情係犯罪，咁有乜好處，解決咗一樣先坐低傾啦。」問到會否用自己的知名度，令國際更關注事件？他笑說：「叫我影響Donald Trump？我覺得全世界得一個人影響到佢，嗰個叫習近平。」
秋生今日到演藝學院出席座談會。（facebook截圖）
秋生反對暴力，認為應止戈制暴。（facebook截圖）
秋生受到學生歡迎。
秋生未有接受訪問。