香港人上年由6月起日以繼夜俾警暴蹂躪身心，黑勢力同政權仲成日製造白色恐怖放風恐嚇港人，八方埋單總結，發現2019年有大量空頭支票，出現咗一批「唔講就唔存在人物」。

頭號「失蹤人物」當然首選「流浮山200刀手」，7.21鄉黑喺元朗恐襲，盛傳有幫派大佬女友被誤傷，於是掀起復仇戰，派200刀手從流浮山出征，更一度令元朗整個下午淪為死城，唔知刀手係蕩失路定未收錢，總之一直冇影；「200刀手」之後曾經「轉戰」其他地區例如馬鞍山，但延續一貫風格玩隱形，踏入2020年，但願唔只刀手，連呢個傳聞都唔好再有。

區選揭冇「沉默大多數」

另一班失蹤人物，係大家由10分鐘等到10萬分鐘都未見影嘅解放軍！解放軍東部戰區陸軍上年8月中曾經針對香港出文評論，話由深圳灣春蠶體育館出發到香港只需要10分鐘，以為解放軍入城會嚇到香港人唔再上街，點知香港人早就識到時返屋企瞓覺，解放軍一定係發現自己冇作用，所以放棄香港！

仲有就係由2014年講到舊年嘅「沉默大多數」，經歷一場區選，揭發咗原來呢班人根本唔存在，仲發現就算有都唔係大多數。港共政權同Popo冇得再幻想有班唔存在嘅勢力支持自己，最近已經改口，將唔係「自己人」直呼暴徒，仲鬧唔同暴力割席就係無恥卑鄙。

八方最後仲醒起有個失蹤人口！時為8.31前夕，有個休班警俾三個刀手襲擊，曲解法例爐火純青嘅有組織罪案及三合會調查科高級警司李桂華公開話從情報顯示，相信事件同反修例風波有關，但呢幾個疑為「獅鳥」始祖義士，一直都無法證實囉。

李八方