唔只薑係老嘅辣，橙都可能係老嘅甜？周五世盃外歐洲區A組，荷蘭喺69歲老帥艾禾卡特第三度執教荷蘭嘅首場世盃外，憑洛賓、史奈達、韋拿杜姆、昆斯普美斯同雲遜贊臣各入一粒，主場5:0大勝盧森堡，雖然對手實力疲弱，總算攞番場漂亮勝仗，賽後6戰得10分升上第3，落後瑞典同法國3分，重燃出線曙光！

老而彌堅嘅唔只艾禾卡特，仲有兩位33歲老將洛賓同史奈達，其中今場取得第131頂「喼帽」、超越雲達沙成為國家隊上陣次數最多球員嘅史奈達，喺34分鐘禁區外勁射破網，證明鋒利嘅刀仲未到生鏽一日！艾禾卡特賽後都話會繼續倚重佢：「史奈達嘅傳送水準仍然超凡，世界上冇幾位球員能與之媲美，我哋會盡量好好利用佢嘅才能。」