金管局總裁陳德霖（Norman）參選下屆特首嘅傳聞，花生友講過，有網媒認真地報道過，不過成件事聽落似流料，噚日陳總當面否認咗，咁有冇興趣做財爺呢？陳總微笑不語，留下無限想像空間。
噚日陳總出席立法會財經事務委員會，可能因為外滙基金上季賺好多錢嘅關係，佢比較輕鬆，仲特登解釋多啲畀新任議員聽，香港貨幣基礎組成係乜東東，好貼心。

到會後見記者環節，陳總被人問到係咪會參選下屆特首，佢之前選擇唔回應，今次就親口話，市場有好多揣測，而媒體所引述嘅消息都唔正確。排除咗參選特首呢個可能性，咁陳總又係咪支持財爺曾俊華參選特首呢？陳總從政多年，又點會咁易表態吖，佢都費事講咁多，直接話唔評論政治議題。
其實，政商界一直盛傳，如果曾俊華做得成特首，好有機會搵陳德霖做財爺。不過家陣曾俊華都未話選，咁陳德霖亦冇乜嘢好講喇，未知數多成咁。
噚日華華問陳總有冇意向為下屆政府服務，例如做財政司司長時，陳總竟然當聽唔到，答都唔答呢條問題，追問多次時，佢都只係一臉微笑，轉頭就走咗去。不過，呢個微笑可能係最有智慧嘅答覆，畀大家無限想像空間。

李華華
mailto:[email protected]