【武漢肺炎】李婉華加國電台員工輪流返工抗疫：要限制公司人流
蘋果日報 2020/03/21 15:55
加拿大李婉華武漢肺炎
（facebook圖片）
武漢肺炎全球大爆發，世界多國全面封關，不過由於肺炎源自中國，不少居住海外華人都受排斥及歧視。《蘋果》今日聯絡移居加拿大溫哥華多年的李婉華，問戴口罩外出可受當地白人歧視時，婉華表示：「而家好啲㗎啦，佢哋唔會話你嘅，我哋呢邊起碼冇發生，因為呢邊華人相對係多啲嘅，啲本地白人會習慣，同埋我哋BC省確診個案今日係增加77宗，所以大家都會好恐慌，確診嘅人都好分散，唔同區都有，連我哋滑雪勝地Whistler都有一班人確診，老人院又有確診，都係人心惶惶。」
日前婉華為網上節目《住加女人》拍攝當地超市情況，結果廁紙被搶購一空，問婉華當地物資是否短缺時，她說：「食物方面，其實唔係冇，不過太多人一次過去搶，梗係冇啦！貨架擺唔到咁多嘢，其實早啲去係可以買得到，同埋好多超市喺8點到9點係畀老人家耆英時間，等佢哋唔使同人爭都可以買到食物。呢度物資係充足嘅。不過因為我哋呢度進入急狀態，變天呀，同之前生活好唔同，學校又無限期停課，所以個個人心惶惶去搶啫，不過政府講到物資係充足嘅，廁紙都係有嘅，我哋本地造嘅，不過同一時間去搶就冇囉。」
婉華表示，她任職的加拿大中文電台亦有採取防疫工夫，婉華說：「我哋有部份主持需要喺屋企用電話做節目。主要嘅staff 就輪流返工，一三五、二四六咁。唔返office嘅話就要home office，基本上我要返電台同其他主持用電話做節目。有啲節目就必須錄音。因為要限制公司人流。盡量減到最低。」
李婉華指電台部份主持要用電話做節目，電台員工也要輪流返工限制人流。（facebook圖片）
李婉華感謝同事Brian送廁紙。（facebook圖片）