購物焦點：
夏季香水生果鮮花混合戰
夏天，百花開到最燦爛之時，而各式水果亦踏入當造期，兩者均進入最佳狀態。女士們每日上班又或出街前，必定噴幾噴嘅香水，你又知唔知今年嘅主流香味是甚麼？今夏香水就以水果加鮮花香味為本，將之混合創作出各式清新香氣，集合各種大自然精華，令你喺汗流浹背嘅日子，可以香得更自然。
記者：許穗齡
攝影：黃子偉
Model：BiBi（StarzPeople）
士多啤梨＋牡丹＝意想不到的甜
士多啤梨一向是女士們的最愛，其外表鮮美可愛不在話下，最重要係其甜美味道清新誘人，今季ESCADA推出的SEXYGRAFFITI，就正正將士多啤梨的特點發揮得淋漓盡致，再將其甜到入心嘅香味加入牡丹及葡萄芳香，味道甜得嚟又唔會太漏。
售價：$435（100ml）（ESCADA）
佛手柑＋玫瑰＝剛烈熱情
今季GIVENCHY推出嘅EAUTORRIDE，瓶身設計選用像冰一般的透明樽身，而樽頂位就有如一團火，所以亦名為FIREINICE，其味道亦切合其外形，以佛手柑、晶狀西洋梨等味道較清淡嘅生果，混合味道濃烈嘅玫瑰及茉莉花等，正好是性格剛強激烈女性的映照。
售價：$398（100ml）（GIVENCHY）
柑橘＋茉莉＝甘甜感性
水果味一樣可以表現出女性化的一面，好似呢款MCMRouge，就以柑橘科植物如佛手柑、橘子同葡萄柚等，混合玫瑰、茉莉等高雅嘅香氣，營造出味帶甘甜及花香四溢的香水，將女性嘅頑強獨立又感性的矛盾形象表露無遺。
售價：$235（50ml）（MCM）
檸檬＋錫蘭花＝異國風情
LOEWE新推出嘅AGUADELOEWE，以罕有獨特嘅檸檬及金蘋果等生果，配合錫蘭花及中國白胡椒等嶄新嘅材料，再加入摩洛哥的阿特力士香柏木同東印度群島檀香等，混製而成一種清新中帶點辛辣的味道，充滿異國情懷。
售價：$360（100ml）（LOEWE）
櫻桃＋櫻花＝日式溫柔美
四月係日本賞櫻花嘅最佳時節，呢款嬌蘭嘅CherryBlossom，就正係因為對櫻花嘅驚豔而創造出來。以櫻花的香味為主，再混入櫻桃味及其他柑桔類的果香，最特別是再加入綠茶芳香，是充滿日本女士溫婉動人感覺的香味。
售價：$300（35ml）（嬌蘭）
哈密瓜＋蘋果花＝綠洲泉水
都市人生活緊張繁忙，喺適當嘅時候真係要放鬆一下，VERSACE今夏推出嘅TimetoRelax，就糅合多種清新的生果味，如哈密瓜同牛油，再配合蘋果花、小菖蘭及卡巴卡巴葉等，氣味清新得有如置身綠洲泉源，令你心神都有如放暑假般舒泰。
售價：$258（125ml）（VERSACE）
香橙＋薄荷草＝嬰兒幼嫩感覺
嬰兒予人純潔幼嫩的感覺，今季BURBERRY的香水BABYTOUCH就以此為主題，以薄荷草、香橙為主，以營造清新感，再加入茉莉及其他香草，混合出一種有如初生嬰孩般無邪潔白的香味，清清地最適合夏天使用。
售價：$277.2（100ml）（莎莎）
蜜瓜＋百合＝清雅脫俗
如果你同小記一樣好怕味道濃烈嘅香水，呢款法國JEANCOUTURIER香水就啱晒你。香水糅合蜜瓜、桃、百合同紫丁香嘅芳香，生果清中帶甜，鮮花自然甘香，兩方互補不足互相襯托，製成品香味清新典雅，加埋淺紫色樽身配襯綠葉，無論外形設計同香味都非常討人歡心。
售價：$360（100ml）（莎莎）
西柚＋玫瑰＝熱情活潑
夏天應該係一個充滿活力的季節，ICEBERG推出嘅EFFUSION就絕對切合動感嘅夏日，酸中帶甘嘅西柚加上浪漫奔放嘅玫瑰，再配合熱情果、茉莉花等香味，製成品帶點刺激性的香氣，感覺熱情有朝氣。
售價：$285（75ml）（莎莎）
店舖資料：
ESCADA、VERSACE、LOEWE
油麻地WingOnPlus地下專櫃
查詢電話：27826273
MCM、GIVENCHY
銅鑼灣TheNewFaceBySogo二樓
查詢電話：28951206
莎莎（23669383）
尖沙嘴加連威老道25號地下
嬌蘭（28920652）
銅鑼灣崇光百貨地下專櫃