NBA季後賽次圈續吹冷風，兩支排名較低嘅球隊，周一首戰都作客擊敗強敵；包括快艇憑基斯保羅（CP3）嘅火熱手感，全場攻入32分，以122:105大勝西岸2號種籽雷霆。
快艇度過班主歧視風波，首圈第7戰險勝勇士後，球員信心返晒嚟，同雷霆嘅次圈搶分大戰，第1場已經進入狀態。CP3第1節3分波5投5中，之後越射越順，加上無私嘅性格，全場貢獻10次助攻，前鋒比歷克格芬、射手哥羅福等都受惠，而錄得雙位數得分；就算雷霆第4節一度追近至爭7分，仍然以17分大敗。全場3分波9射8中嘅CP3，賽後就解釋自己神準之迷：「我特別提早嚟到球場練習，加強投射訓練，所以先有咁嘅效果。」

料game 2賽前頒獎

雖然首戰失利，不過雷霆前鋒杜蘭特（KD）周二仍然拎到常規賽MVP，預料周三舉行嘅第2戰會進行頒獎儀式；失落常規賽MVP嘅熱火前鋒勒邦占士話：「KD今季連續25+、30+，攻守都好出色，值得拎呢個獎，我衷心祝賀佢。」
同日另一場，由東岸1哥溜馬主場對第5位嘅巫師。溜馬上圈已經幾乎俾鷹隊「黑8」，但球隊冇吸取教訓，次圈首戰對巫師嘅後衞孖寶比爾同禾爾冇晒符，比爾全場攻入25分，禾爾就貢獻13分9助攻，作客以102:96贏波。
主隊明星中鋒希拔繼續做笑柄，上陣18分鐘竟然0分0籃板，反而累積5次個犯；據espn嘅效能統計，佢竟然係-17，真係陀衰家。