【本報訊】汽車攝錄鏡頭，又再拍攝驚險車禍實況。一輛豐田Corolla私家車，前晚駛經黃大仙龍翔道，連續爬頭後失控狂撼石壆，翻滾10周後輪飛脫，年輕司機奇蹟受輕傷。
這段被上載至YouTue的片段名為「龍翔道交通意外（AE100）」，片長15秒，顯示時間日期為前晚10時03分左右，更備有「前傳」片段，惟意外經過片段其後被人刪除，但網民瞬即backup重新放上網。
出事豐田Corolla私家車，棍波操作，司機位有桶型跑車座椅，亦有合金胎軨，一副「戰鬥格」，車禍間嚴重撞毀，左右前輪扭曲，右後輪飛脫。男司機周×華（20歲）僥倖僅右手肘受輕傷，在場接受警員查問時神情輕鬆，還不停講手機。

片段所見Corolla沿龍翔道東行中線駛往觀塘，在天馬苑對開高速爬頭後切回慢線飛馳。另一輛七人車，擬由中線直接向左駛入馬仔坑道支路離開龍翔道，Corolla沿慢線從後馳至拒絕減速讓路，七人車司機立即減速。但Corolla越過七人車切出中線後，司機疑扭軚「扭過龍」，Corolla失控直撼路邊石壆，全車彈起翻滾逾10周，着地火花四濺損毀。