無綫非戲劇製作總監余詠珊搞完港姐之後又有新搞作，幫無綫收費電視台搞咗個節目《不得了》，專係講世界各地一啲香港人甚少認識嘅名人生活，早前已經公開招募台前幕後包括主持、記者、撰稿員、導演等。

落選港姐做主持

余詠珊話因為想講名人嘅生活，所以會搵啲富二代做主持，其中佢對何家淑女、賭王何鴻燊嘅兩位靚千金何超蓮、何超雲好有興趣，余詠珊話：「其實呢啲主持好似blogger咁，超蓮佢哋一定係好識嘢，佢哋知嘅嘢、去嘅地方未必係一般人常常去嘅地方。」超蓮一直係唔少宅男嘅女神，如果佢真係做電視節目主持帶觀眾遊埠見識，馮仁昭都覺得有睇頭。
其實主持除咗瞄準呢類有吸引力嘅富二代外，余詠珊之前已經喺一班落選港姐裏面揀咗蟀，張鈞美、尤蔭蔭、譚曉榆都成功過關將會入選接受訓練，而節目嘅招募行動已經截止，將喺嚟緊星期日（16日）進行面試。