銀行與信託公司合作理財產品，已由去年9月底不足6000億元人民幣，狂飆至4月底嘅1.88萬億元，規模已及今年首5個月新增貸款嘅5成，真是「上有政策下有對策」。
銀監會全面叫停，皆因有統計指，現時市場上有32家銀行及36家信託公司手挽手參與發行咗足足413款呢類產品，當中唔少是由地產商發行，監管當局無從直接由銀行賬簿得知風險有幾大，一眾被產品高息吸引嘅買家，肯定係最後大贏家，皆因就算發行人衰咗還唔到，債務最終由銀行承擔，這種變相曲線繞過國策對調控新增貸款規模嘅辦法，如同自製影子銀行系統，唔即時全面將銀信嘅聯盟斬斷，隨時又是另一個計時炸彈。

投資勿罔顧風險

聽講6月1日銀監會已緊急召集12家銀信業務規模最大嘅信託巨頭開會，點知他們當銀監冇料到，當局惟有於上周五二話不說就殺個措手不及。
幸好銀監會有主席劉明康坐鎮，內行人管內行人，及時堵住政策漏洞，起碼毋須擔心有人越踩越深，原來中國人真係要管？尤其係對付呢班「精甩辮」，擺明打響晒如意算盤，要利用銀行龐大銷售渠道搵食，急於擴大非利息收入（內地稱之為中間收入）嘅銀行。
防患未然總好過賊過興兵，溫家寶我哋支持你！劉明康我哋支持你！最緊要繼續幫中港存戶及小股東守住個龍門口及看守呢班大帝！
半年業績期臨近，睇怕財經組記者見到內銀班高層，要問埋佢哋發行咗幾多銀信合作理財產品、幾長年期，中國財富管理產品透明度一向低。
投資者必須注意，有幾多債務是被打包甚至再打包成咁賣出去，就算間間銀行都睇住阿爺有2.7萬億美元外滙儲備，但投資都唔應該罔顧風險。

胡孟青
獨立股評人