23歲o靚模謝芷蕙（Cammi）秘密拖新仔、「年青版魯振順」蜜遊東京，被讀者陳小姐透過《蘋果》「爆相爆片」分享佢哋日本地鐵車廂攬實相片。Cammi旅程中都有喺Instagram分享旅遊靚相，但仍然係收埋男友，未有貼出兩人親暱合照放閃，難得低調。Cammi噚日喺Ig貼出床照，背景高樓大廈顯示係香港，原來五日四夜預支蜜月已結束，返咗香港喇。

Cammi本月3號朝早抵達東京，下塌酒店即貼相Ig後留言：「我最愛的城市，一年沒來了。」喺東京吃喝玩樂，Cammi拍拖去咗銀座、淺草神社外，又去山中湖睇富士山，好鬼浪漫。Cammi同男友去淺草神社時，仲一齊換上情侶和服，熱戀中嘅Cammi仲求籤，佢留言：「今年又求到吉籤啦，希望未來順順利利。」男友錫到燶嘅Cammi，點止中吉籤，簡直中咗「大獎」啦！

因為Cammi貼出靚靚P圖，呃到網友畀like，Cammi都分享靚相秘密：「好多人問我用甚麼拍照，我用的是iPhone用foodie和vsco調色。」不過亦有網友留言爆Cammi交上澳門賭廳富商照顧，揶揄佢「拜金女」，Cammi不卑不亢反擊：「我不認識賭廳富商，但是來東京旅遊吃飯，也不需要花很多錢，正常上班一族都可以負擔的。」

《蘋果》聯絡過Cammi，佢大方承認有新歡：「我同佢一齊咗唔係好耐，自己未喺Instagram各方面公開，想私隱啲，保護戀情，始終時間唔係好耐，但咁唔好彩畀人影到都冇辦法。我哋一行五、六個人，分別去一個地方一齊玩，我同ex分開咗大半年，遇到個還可以，溝通到、合適嘅想試吓發展。」Cammi話男友大約30歲。

男友背景，係咪傳聞中賭廳富商？Cammi避談：「佢其他問題就講啦，都係佢嘅私隱。佢唔係做賭廳，以前喺澳門有做過生意，賭聽呢件事我都諗唔明。」Cammi拒絕提供男友資料，但佢哋發展到結伴外遊，係咪都有結婚打算？Cammi話：「同佢一齊咗幾月咋，梗係冇結婚打算，大家仲了解當中，未去到好了解，依家暫時大家開心囉！」Cammi話仲未帶新男友見家長。

精選娛聞，喺晒《娛果》
http://fb.com/appledailyent