揸車瞌眼瞓 一指抗睡魔

蘋果日報 2011/07/25 00:00


揸車時遇上睡魔急Call真係幾難頂,如果好似早前個內地司機咁,喺屯門公路揸揸吓車,都可以喺快線瞓着覺,仲搞到大塞車,就算自己唔面懵,都對唔住各路街坊。真係超眼瞓,又唔可以即時停架車瞌一瞌,要睇睇中醫師教大家幾個醒腦一指按穴位方法,保證你醒神!

記者:趙慧敏
攝影:譚盈傑
Model:Hailey、LaYing@GME
傍身醒神穴位
empty
有時揸住部車,唔係隨便可以買杯咖啡醒醒神,呢個時候知道邊個係提神穴,至少可以將疲倦感暫時掃走,漢方妍肌堂中醫藥中心註冊中醫師彭明慧就搵咗幾個穴道給大家傍身,不過彭醫師講到明,人體提神穴位其實唔少,不過呢幾個穴道較適合在車上進行,所以要除鞋又或者企喺度按壓嘅穴位,坐喺車內一概不適用。
百會穴
喺頭頂正中最高點,不過呢個穴位唔係按壓,而係彈佢,用食指、中指及無名指輕彈穴位,要聽到咚咚聲至算正確,每次彈10至20次,有提神醒腦作用。
empty
太陽穴
太陽穴位置應該無乜人唔知,用食指分按太陽穴兩側,打圈轉動持續30秒,醒神之餘,更加可以舒緩頭痛,不過切忌用力過度,感到酸脹就可以。
empty
風池穴
呢個穴位位於頸項後部的凹陷處,按壓時可能要靠其他人幫幫手,事關頭要稍稍後仰,拇指環形轉動揉穴位約1分鐘,反覆做5次。功效唔止可以暫時消除倦意,仲可以令雙眼更精靈。
empty
中冲穴
位於中指末節尖端中央,即近指甲邊緣位置,左右手中冲穴各揉揑一分鐘,比較哪一隻手疼痛感較明顯,即代表那邊肢體較疲倦後,就繼續按那邊穴位。不過提醒大家,自行按壓可能令兩手都離開軚盤,按壓時都係搵別人幫手好啲。
empty
古靈精怪提神法
唔少車主都會互相交流一啲提神心得,其中不乏毫無科學根據的偏方,至於係咪有效,真係要試過至知。
爆機
吵鬧的音樂雖然可以將半昏迷的司機嘈醒,不過音響太大,道路上發生乜事都聽唔到,一樣危險。

方便度:★★★★★
有效度:★★★☆☆
危險性:★★★★★
empty
超強薄荷糖
啪番粒超強薄荷糖,簡直可以令腦門一震,不過缺點是嚟得快、去得快,功效不持久。

方便度:★★★☆☆
有效度:★★☆☆☆
危險性:☆☆☆☆☆
empty
退熱貼
很偏鋒的提神法,不過凉浸浸的退熱貼貼在額頭,確實帶來清凉的感覺,好過敷濕毛布,且無礙雙手揸車,不過點知會唔會惹嚟警察懷疑,以為你發緊燒都揸車。

方便度:★★☆☆☆
有效度:★★★★☆
危險性:★★☆☆☆
empty
凉浸浸飲品
冰凉飲品驅走倦意,不過揸住車搵杯冰凉飲品真係唔易,一般人架車又點會裝部雪櫃喎,既然買得罐汽水,不如飲杯咖啡可能更有效。

方便度:★★☆☆☆
有效度:★★★★☆
危險性:☆☆☆☆☆
empty
司機大佬大姐提神法
Christine:「自己唔係成日揸車,好少瞌眼瞓,不過想精神啲都會食住香口膠,或者開大音樂。」
empty
阿雄:「食嘢就最可以提神,我乜都食,零食之中最好就係食糖。」
empty
蔡先生:「自己揸早更,好少瞌眼瞓,做司機最緊要瞓得足,不過我就算唔眼瞓都會食吓薄荷糖提神,家我都食緊。」
empty
周先生:「後生時一日踩足兩更,揸車就會瞌眼瞓,都試過揸揸吓車過咗線,即時扎醒都嚇一跳。我提神一係就吸煙,又或者擺定啲濕紙巾喺車,眼瞓咪抹吓面囉!」
empty