今期（4日）賽事頭場五班1200米，麥菲文馬房九歲老馬「名馬」係全港唯一仍然服役嘅M字號布馬匹。

本身競賽生涯步入最後階段，難得季初由告廐轉投麥廐狀態回勇，上兩場喺潘頓胯下分別跑入亞軍同第五名。

今場潘頓一早卜定騎葉楚航馬房「神寳金剛」，「名馬」遂改由另一位前香港冠軍騎師接手，仲要就係多年前嘅最佳拍擋：韋達！

「名馬」至今跑過66場，韋達騎過11次，獲得2冠2亞3季，上名率超過一半，但兩場頭馬已經係2011年10月同11月嘅事，當時「名馬」仍然係蔡約翰馬房一匹質新分子，而韋達則是呼風喚雨嘅香港冠軍，更係蔡廐頭號殺手。

往事只能回味，人馬嘅成績今非昔比，但故劍重逢，呢個巧合就連十三少韋達都感到奇妙，話估唔到今次仲有機會騎到「名馬」出賽，老黃忠喺上月26號由佢親自試閘仍有兩腳，狀態保持得唔錯。

馬圈內有句名言：「五班賽事，任何事情都可以發生。」，如果「名馬」今日能夠贏馬，人馬事隔超過六年再次一齊入凱旋門，相信騎者別有一番滋味。