現年44歲的鍾麗緹（Christy）昨日現身觀塘如心艾朗酒店，與比她年輕12載、合拍內地真人騷《如果愛》的拍檔張倫碩宣傳。Christy在節目拍攝期間已與張倫碩傳出緋聞，昨日二人合照時盡顯默契，態度親暱亦冇尷尬，她接受訪問時指對方十分浪漫，常給她驚喜，Christy更大談她的愛情觀：「啲人覺得我結過兩次婚，又生過小朋友，就覺得要放棄追求愛情，我係從來冇放棄過，愛情唔係只係畀20幾歲，我40幾歲就要搵個60歲男仔？我就係想用我嘅情況講可以勇敢去愛。」
Christy表示不抗拒姊弟戀，亦透露囡囡也十分喜歡張倫碩：「佢唔淨係靚仔，好陽光同我一樣，鍾意做運動，好夾。小朋友有同佢一齊拍過節目，都好鍾意佢。」問到她真實的感情生活，她未有正面回答：「喺個節目拍得咁開心，現實當然一樣，自己都係諗搵一個人同我好多嘢講，有共同愛好。」

再婚要睇緣份

問Christy會否考慮結第三次婚，她即大笑：「嘩，唔會有第三次咩？自己覺得緣份要順其自然，要睇兩個人夾唔夾，睇個天嘅安排，以前淨係諗要個人好高、好有名、成功，𠵱家要睇緣份。」Christy透露會與三個女兒講感情事：「大女18歲都已經有拍拖，我會同佢傾點睇男人對自己係好唔好，叫佢唔好諗咁深同期望太大，因為佢出年返加拿大讀大學，可能會分開，最緊要每日都開心，會同佢分析。」另外，問到她三個女兒會否選美，她笑言：「大女比較內向，第二同第三個可能會，佢哋好鍾意上電視。」
採訪：梁錦雯
服裝：Dorian Ho Homme（張倫碩）