江嘉敏瞞男友「偷食」新聞翻hit 不忿被翻舊賬：唔該唔好消費我
蘋果日報 2020/12/09 16:21
江嘉敏AnthonyX先生王仁灝
江嘉敏不忿被翻舊賬，在IG指自己當時已經就事件澄清。
江嘉敏入行短短日子，是非、緋聞加加埋埋10隻手指數唔晒，當中包括扭計被大台掟入雪櫃，拍劇時又先後和余德丞、何廣沛和王浩信等人傳過緋聞，早前又因上富豪船P和好姊妹馮盈盈反目。被指拜金的江嘉敏，現時已成功和小小超女友郭嘉文埋堆一齊玩，向上流社會邁進一大步。
相比以上是非，以下一單的花生味更濃。去年9月，《壹週刊》報道江嘉敏瞞着電競公司高層男友Anthony繼續收兵，疑暗媾男友的朋友兼生意拍檔X先生，二人的WhatsApp截圖更被流出。江嘉敏除叫對方以50萬打本給她做生意開琴行外，又指二人夾計隱瞞Anthony，以公幹為理由齊齊飛去日本「偷食」。由於近日這段新聞再度在YouTube上架，結果看過的人再次重溫，未看過的人又互相轉載，成為茶餘飯後話題，結果成功令這單新聞翻hit。而當事人江嘉敏估計受這件事影響心情，昨日在IG動態上疑似不忿被人翻舊賬說：「事實真相已經有好多好好嘅報紙同記者幫我澄清咗！唔該唔好再消費我！多謝。」
去年這段新聞出街後，江嘉敏雖然承認被樂易玲照肺，但她亦抵唔住頸在IG出post反擊，更開名指X先生叫王仁灝，她直指對方將WhatsApp的訊息「cap頭cap尾」，又指這樣做絕不會影響她和男友感情。不過《壹週刊》之後再爆料，指江嘉敏趁王仁灝去日本、意大利等地方公幹時，Cap圖列出送禮清單，包括Hermes手鈪、拖鞋、粉底、100份日本手信等，還試探叫男方買一部價值80萬的七人車，被指貪婪之極。
江嘉敏去年9月被指暗媾X先生，又叫對方狂買手信和名牌，近日新聞再度上架，依然受網民高度關注。（IG圖片）
X先生被江嘉敏開名，真名叫王仁灝的X先生，有指和陳冠希有生意往來。（IG圖片）
去年傳出負面新聞後，江嘉敏火速和男朋友在IG現身力證情不變。（IG圖片）
由於早前的富豪船P羅生門事件，令江嘉敏和馮盈盈反目。（IG圖片）
江嘉敏現時已成功和小小超女友郭嘉文埋堆。（IG圖片）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！